Ýar bizim sary

Gulzumy¹ gyrsanyp kyrk ýol geçer men,

Eger ki meýl etse ýar bizim sary;

Gadam ýerne ganat baglap uçar men,

Diýse dilber: «Aşyk, ýör bizim sary».

***

Kyrk ýyl gol gowşuryp, gullukda dursam,

Alty günçe görmen, altmyş ýyl ýörsem,

Bir şunçakly bolsa, görsem, jan bersem,

Jemalyn arz etse bir bizim sary.

***

Ne laýykly ýüzüm bardyr tutarga,

Ne aýry gapym bar onda giterge?

Umyt bar goýnunda bile ýatarga,

Dergahyndan açsa der²bizim sary…

***

Bir kimse ýolukdy desti³şeraply,

Ýelden jaýnamazly⁴, suwdan mähraply,

Egni ak redaly⁵ ýaşyl nykaply

Ugraşdy bir ajap är bizim sary.

***

Ýoldaş bolup bile ýördüm bir meýdan,

Meýdan içre dolup oturmyş merdan,

Bir eýwan üstünde çyrlap tört ýerden,

Diýdiler: «Goluňny ber bizim sary!».

***

«Pyragy!» diýp çagyrdylar, eltdiler,

«Kandadyň?» diýp, gulagymdan tutdular,

Istihanym⁶ altmyş para etdiler,

Diýdiler: «Mert olsaň, ýör bizim sary!»

***

Magtymguly bäş gün aşret sürmäge,

Jaý imesdir eglenmäge, durmaga,

Kararym ýok oturmaga, turmaga

Agzyn açyp durmuş ýer bizim sary.

******

1 Gulzum– Müsür bilen Arabystan aralygynda bolan Gyzyl deňiz.

2 Der– gapy, işik.

3 Dest– el.

4 Jaýnamaz– namazlyk.

5 Reda– don

6 Istihan- Sünk